Løgmaður: Nú rakk mítt tol ikki longur

Tá landsstýrismaðurin beinleiðis mótsigur løgmanni, so var mítt tol uppi, og tí valdi eg at siga Jenis av Rana, landsstýrismann við uttanríkis- og mentamálum úr starvi.

Soleiðis segði Bárður á Steig Nielsen, løgmaður, fyri útvarpið fyri løtu síðani.

Tað kom sum ein bumba beint fyri klokkan 11, at løgmaður hevur handað Jenisi av Rana uppsøgn.

Orsøkin er tað, sum Jenis av Rana hevur sagt eftir at løgmaður í gjár boðaði frá, at málsøkið um rættindini hjá sammøðrum, varð tikið frá Jenisi av Rana og flutt til Magnus Rasmussen, landsstýrismál. Hetta tí, at Jenis av Rana hevur bølt oman á málinum at børn hjá samkyndum kvinnum kunnu fáa eftirnavnið hjá sammóðurini.

Jenis av Rana landsstýrismaður segði í samrøðu við FM1 í gjár, at hann er inniliga í móti – vegna hansara trúgv – at geva sammøðrum hesi rættindi, og at hann eisini vónaði at Magnus Rasmussen heldur ikki fór at líða boðunum frá løgmanni.

Hetta var eftir øllum at døma tað, sum fekk bikarið hjá Bárði á Steig, løgmanni at flóta yvir.

Løgmaður segði í samrøðuni við útvarpið, at samstarvið við Miðflokkin ikki er uppsagt. Komandi tímarnir fara at vísa, um Miðflokkurin heldur fram í samgonguni, ella tekur seg úr.