Innanlands

Løgmaður skal luttaka í trygdarráðstevnu í Týsklandi um vikuskifti

Trygdin í Arktis skal millum annað á breddan. Hetta er bert aðru ferð uppá 52 ár, at umboð fyri Føroya landsstýri eru boðin at luttaka

- Tíðin krevur – kanska meira enn áður - at vit standa saman og samstarva við hini sameindu í NATO um trygdar- og verjumál. Aksel V. Johannesen skal luttaka á pallborðsfundi og eisini fundast og lurta eftir sjónarmiðum hjá øðrum londum (Savnsmynd: Jens Kr. Vang)

2025-02-12 11:00

Agnar Prestá

Altjóða trygd fyllur meira og meira. Verjumálaráðharrarnir hjá USA og Ukraina møtast í dag, og Pete Hegseth hevur eisini biðið um fund við sín danska samstarvsfelaga Troels Lund Poulsen.

Hetta váttar danski verjumálaráðharrin fyri TV2. NATO-limir viðgerða í løtuni støðuna, og trygdin í Arktis er javnan uppi at venda.

Tað er serliga tað síðstnevnda, sum Føroya Løgmaður, Aksel V. Johannesen, skal umrøða á stóru altjóða trygdarráðstevnuni Munich Security Conference.

Ráðstevnan hevur verið á hvørjum ári síðani 1963, men hetta bert aðru ferð, at umboð fyri Føroya landsstýri eru boðin at luttaka.

Hetta staðfestir Løgmansskrivstovan fyrrapartin.

- Á ráðstevnuni skal løgmaður millum annað luttaka í pallborðsfundi um trygd í Arktis, umframt at hann eisini skal hava ymsar politiskar fundir.

Á ráðstevnuni í München luttaka áleið 60 stjórnarleiðarar, 150 ráðharrar, umframt serfrøðingar, granskarar og umboð fyri felagsskapir úr øllum heiminum til at viðgera spurningar í mun til trygdar- og verjupolitikk.

Harvið eru tað háaktuel evni, sum verða viðgjørd í Suðurtýsklandi um vikuskifti. Áhugamálini hjá Føroyum skulu tryggjast, men hetta er eisini eitt gott høvi at hoyra millum annað amerikanskar ætlanir, staðfestir Aksel V. Johannesen

- Tíðin krevur – kanska meira enn áður - at vit standa saman og samstarva við hini sameindu í NATO um trygdar- og verjumál. Í løtuni er tað soleiðis, at hvør nýggjur dagur merkir nýggjar avbjóðingar. Tí skulu vit taka lut á teimum pallum, vit kunnu, fyri at tryggja áhugamálini hjá Føroyum í Arktis og Norðuratlantshavi. Men trygdarráðstevnan er eisini eitt høvi at hoyra nýggju amerikonsku stjórnina leggja fram sínar ætlanir fyri Ukraina og samstarvið við Evropa sum heild.

Vinarliga broyt tínar kennifíla - og privatlívsstillingar fyri at síggja hetta innihald