Løgtingið kemur saman aftur í dag

Eftir ein vetrarstøðg í løgtingsarbeiðinum, er tingið kallað saman til løgtingsfund aftur í dag klokkan 14.

Hóast tað liggja nøkur uppskot, sum longu eru framløgd og eru klár til fyrstu viðgerð, so er einans framløga á skránni til fundin í dag. Tey uppskotini, sum liggja klár til fyrstu viðgerð, eru sett á skrá til tingfundin, sum verður hósdagin.

Eisini í morgin er kallað til fundar í løgtinginum har munnligir fyrispurningar til lanndsstýrisfólkini eru á skránni.

Aksel V. Johannesen, løgmaður, hevur fyrr sagt, at á hesum fundinum er ætlanin at hava nevndarval á skránni. Bíðað hevur verið í spenningi eftir hvussu Javnaðarflokkurin fer at skipa sínar nevndarsessir eftir útskiftingina í landsstýrinum, sum var í heyst.

Talan er um at geva Ingilín D. Strøm, tingkvinnu, ein ella fleiri nevndarsessir, sum samsvara til hennara støðu sum tann, sum fekk næstflestar atkvøður á javnaðarlistanum á løgtingsvalinum seinast.