Madeleina Albright er deyð

Fyrrverandi amerikanska uttanríkisráðkvinnan, Madeleine Albright, er deyð, 84 ára gomul.

Tað váttaði familja hennara í gjár. Í eini fráboðan siga tey, at Madeleine Albright doyði av krabbameini við familju og vinum rundan um seg.

- Vit hava mist eina kærleiksfulla mammu, ommu, systir og vin, verður sagt í fráboðanini á Twitter.

Below is a statement from the family of @Madeleine: pic.twitter.com/C7Xt0EN5c9

— Madeleine Albright (@madeleine) March 23, 2022

Albright var fyrsta kvinna við evstu ábyrgd av amerikanska uttanríkispolitikkinum.

Hon var ráðkvinna undir Bill Clinton, forseta í árunum frá 1997 til 2001. Í árunum 1993 til 1997 var hon amerikansk sendikvinna í ST.

Madeleine Albright varð fødd í Prag í Kekkoslovakia og fekk navnið Marie Jana Korbelová. Tá Týskland undir leiðslu av Hitler gjørdi innrás í landinum, flýggjaði familjan til London, har tey upplivdu ógvusligu týsku bumbingina av enska høvuðsstaðnum.

Í 1948, tá hon var 11 ára gomul, flutti familjan til USA.

Hon fekk ein katólskan uppvøkstur, men tað var ikki fyrr enn hon varð vorðin vaksin og foreldrini langt síðan vóru deyð, at hon fann útav, at hon var av jødiskari ætt, hevur hon skrivað í endurminningum sínum.