Maður sló út og doyði

Ein sjómaður doyði eftir at hann sló út úr einum fiskifari í hetlenskum sjógvi í nátt.

BBC og Shetnews skriva, at boðini komu klokkan 03:20 í morgun frá einum fiskifari, ið var statt 30 fjórðingar í ein landsynning úr Sumburgh Head.

Bjargingartyrla frá The Shetland Coastguard varð send avstað at leita. Um fýra tíðina funnu tey mannin í sjónum, tóku hann upp og fluttu hann til lands í Hetlandi har hann varð fluttur á Gilbert Bain Hospital í Lerwick. Á sjúkrahúsinum varð staðfest, at maðurin var deyður, upplýsir løgreglan fyri miðlunum.

Løgreglan fer nú at seta í verk eina nærri kanning av, hvat hendi í sambandi við vanlukkuna.

Onki verður upplýst um hvaðani deyði sjómaðurin er, og hvørjum skipi hann sigldi við.