Marius DC gevur ongum grið við nýggja staklagnum EGO

Marius DC hevur í dag latið nýggja staklagið EGO úr hondum, hetta er fyrsti staklagið av komandi EP’ini LISTAMAÐUR.

EGO vísir okkum 20 ára gamla listamannin, í eini sera ágangandi útgávu. Móðurmálið verður toygt og tamba, og úrslitið er eirindaleyst. 

Heitið á sanginum gevur eina ábending um ein ávísan tóna í lagnum, men tá ið Marius DC byrjar at rappa, er ongin ivi um, at hetta er ein ungur maður, sum er væl nøgdur við seg sjálvan.

Rútmiska beat'ið, ávirkað av crunk-stíli, styrkir bert tann agressiva og sjálvsikra tónan í EGO, við eini stakato basslinju, kraftmiklum trap-trummum og Lil Jon-kendum klappum, sum undirstrika seigliga stevið hjá Mariusi.

Hetta er annað staklagið hjá Marius DC í 2024 eftir langtandi indie-balladuna "Leggur tú enn í?"

Á hesum lagnum vendir rapparin aftur til sínar røtur við reypandi rapp tekstum. Sjálvur sigur, hann, at lagið bert er ein partur av eini størri ferð, ið verður lýst á komandi EP'ini: LISTAMAÐUR.