Meira koppingarevni kom í kvøld

Ein nýggj sending av koppingarevni móti covid-19 kom við flogfarinum hjá Atlantsflog, sum lendi um 18 tíðina í kvøld.

Higartil hava Føroyar bara koppsett fólk við koppingarevni frá Pfizer, og hesaferð er tað aftur frá Pfizer. 1350 skamtar komu til Føroyar í kvøld, upplýsir Hjalti Gunnarstein, landsapotekari, fyri útvarpinum.

Koppsetingin verður tikin upp aftur í morgin, og tá verða fólk á stovnum undir almannaverkinum í Havn og Runavík koppsett.

3808 fólk, sum er 7,2 prosent av fólkatalinum, hava fingið seinna prikið, og eru liðugt koppsett móti korona.