Mest kavi komin niður í Suðuroy

Koyrilíkindini eru framvegis vánalig í morgun við jarðroki nógvastaðni. 

Men nú er koyrandi til flestu bygdir norðanfjørðs, upplýsti Landsverk fyri Kringvarpinum klokkan 7. Yvirhøvur eru Norðoyggjar slopnar lætt hesaferð, meðan tann mesti kavin er niðurkomin á sunnaru oyggjunum.

Kavaruddingarmaskinurnar eru við at vera komnar oman til Gjáar og til Hellurnar verður eisini koyrandi heilt skjótt.

Á Vestmannavegnum hava verið trupulleikar í nátt. Eitt nú hava nakrir bilar staðið fastir, og tað hevur forðað ruddingararbeiðinum. So í løtuni er bert eitt spor at koyra eftir á Vestmannavegnum.

Tað eru tær sunnara oyggjarnar, sum hava fingið mest kava hesaferð.

Tey eru nú liðug at rudda vegirnar á Sandoynni – bara Skarvanes er eftir.

Í Suðuroy hevur ikki verið koyrandi millum bygda í nátt, men nú er koyrandi millum tær størru bygdirnar. Til Sandvíkar er skjótt koyrandi, men tað tekur eina tíð, áðrenn vegirnir eru ruddaðir til Famjins, Lopra, Akrar og Sumbiar.