Myanmar: 113 fólk deyð í skriðulopi

Minst 113 fólk eru deyð í sambandi við eitt skriðulop, sum í dag rakti eitt nám í norðrara parti av Myanmar.

Tað upplýsa myndugleikarnir í landinum fyri AFP tíðindastovuni.

Fyrst varð boðað frá, at 50 fólk vóru deyð, men talið varð stutt eftir hækkað.

- Til samans hava vit higartil funnið 113 lík, skrivar bjargingartænastan á staðnum í eini dagføring á Facebook.

- Námsarbeiðararnir vórðu kvaldir í eini flóðaldu av runu, sum hendi orsaka av ógvusligum avfalli í økinum hesa seinastu tíðina, sigur ein talsmaður.

Regnið er eisini orsøk til, at bjargingarliðini máttu gevast við bjargingar- og leitingararbeiðinum, sigur ein løgreglumaður.

Sambært BBC hendi skriðan í einum námið, har gravað verður eftur játusteini í Hpakant-økinum í Kachin landslutinum.

Myanmar er tað landið í heiminum, sum útflytir mest játustein í heiminum. Játusteinur, ella jade, verður brúktur til smúkkur.

Í 2016-2017 seldi landi játustein fyri næstan fimm milliardir krónur, vísa almenn hagtøl.

Fleiri álvarsligar vanlukkur hava seinastu árini veri í játunámunum í Myanmar, skrivar BBC.

Nógvir láglønararbeiðarar úr øðrum londum leita til hesi nám at finna arbeiði, men eisini fátæk fólk í hópatali leita sær inn í økið fyri at vita, um tey kunnu finna smáar gimsteinar í stóru dungunum, ið liggja eftir at stóru námsfeløgini hava vunnið sítt.

Við fyribils 113 deyðum er henda vanlukkan tann størsta, sum er hend hesum ídnaðinum nakrantíð, skrivar AFP.