Ingi Samuelsen
Farmaskipið Mykines hjá Smyril Line kláraði ikki at runda molan í Tórshavnar havn, tá skipið kom á Havnina um 22-tíðina í gjárkvøldið.
Tá skipið skuldi manøvrera inn í havnina, bar tað við molan, og Mykines fekk eina lítla rivu á stýriborðssíðu mittskips.
Ring líkindi við nógvum vindi vóru í gjárkvøldið, og tí var sleipibáturin Samson tilkallaður at hjálpa til at leggja til bryggju. Men kortini rendi skipið á molan.
Rúni V. Poulsen, stjóri á Smyril Line sigur, at talan er um lítlan skaða. Rivan er nakrar fáar sentimetrar. Holið verður nú bøtt aftur, og Rúni V. Poulsen roknar við, at Mykines kann fara í fasta sigling aftur í morgin.
Vakthavandi hjá Tórshavnar havn sigur, at ein pullartur uttast á molanum fór í hendingini, men annars er ikki full greiða fingin á skaðarnar. At síggja til hevur bryggjukanturin ikki tikið stóran skaða, men tað skal kannast nærri, sigur vakthavandi.
Omanfyri er ein AIS video av hendingini:
Vinarliga broyt tínar kennifíla - og privatlívsstillingar fyri at síggja hetta innihald