Nancy Pelosi vil ikki halda fram sum demokratiskur leiðari í Umboðsmannatinginum

Nú tað er greitt, at republikanarar hava vunnið meirilutan í amerikanska Umboðsmannatinginum, boðar demokraturin Nancy Pelosi, sum seinastu árini hevur verið forkvinna í tinginum, frá, at hon ikki fer at stilla uppaftur, tá demokratar skulu velja nýggjar leiðarar síðst í hesum mánaðinum.

Heldur enn at halda fram sum leiðari fyri demokratiska minnilutanum í tinginum, er tíðin komin at lata eitt nýtt ættarlið taka yvir, sigur 82 ára gamla Pelosi.

Nancy Pelosi hevur verið limur í Umboðsmannatinginum síðan 1987, demokratiskur leiðari í Umboðsmannatinginum síðan 2003, og forkvinna í Umboðsmannatinginum í tveimum umførum – frá 2007 til 2011, og aftur síðan 2019. Hon er fyrsta og higartil einasta forkvinna, sum Umboðsmannatingið hevur havt, skrivar Reuters.

Síðst í oktober varð maður hennara, Paul Pelosi álopin í heiminum hjá parinum í San Francisco í Kalifornia. Álopsmaðurin leitaði eftir henni, men hon var ikki inni, og legði hann á mannin í staðin. Í samrøðu við CNN, sum DR endurgevur, segði Nancy Pelosi, at hetta fór at fáa týdning fyri politisku framtíð hennara.

Hóast hon fer frá sum forkvinna, ætlar hon at verða verandi í Umboðsmannatinginum.