Nógv fleiri gistingar í februar í ár enn í fjør

Okkurt bendir á, at tað gongur betur hjá føroysku gistingarhúsvinnuni, enn tað hevur gjørt seinastu mánaðirnar. Nýggjasta uppgerðin yvir gistinætur hjá Hagstovuni vísir, at tað tilsamans vóru 7.400 gistinætur á føroysku gistingarhúsunum.

Tað er størsta talið fyri ein februar mánað higartil, og nærum 900 fleiri gistinætur enn í sama mánaði í fjør – og tað var áðrenn korona fór at herja í Føroyum.

Gistinætur telja, hvussu nógvir og hvussu leingi persónar gista á gistingarhúsum.

Tað eru gistingarhúsini í Tórshavnarøkinum, sum eiga so at siga allan partin av gistináttunum, við tað at tær vóru 7.200 í Havn og bert 220 uttan fyri Havnina í februar.

Tá hugt verður eftir hvaðani gestirnir koma, sæst týðuliga at økingin í februar skyldast, at føroyingar í heilt stóran mun eru farnir at keypa sær gistingar á hotellunum í Havn. Nýggju hotellini hava jú marknaðarførst seg sjónliga við tilboðum, nú tað ikki hava verið nóg mikið av útlendingum í landinum at fylla nógvu seingjarplássini.

Í februar minkaði talið av gistináttum hjá dønum við 39 prosentum í mun til í fjør. Hjá fólkum úr øðrum londum minkaði talið niður í helvt, meðan gistinæturnar hjá føroyingum tvífaldaðust úr 2.500 í februar í fjør til næstan 5.300 í februar í ár.

Í fjør komu tvey nýggj gistingarhús umframt at onnur vórðu útbygd. Nýtslustigið vísir, hvussu stórur partur av tøku kømrunum verður brúktur. 

Hóast vøkstur er í gistináttum og innskrivingum, so er nýtslustigið væl lægri í februar í ár við einans 23,5 prosentum í mun til 35,1 prosent í februar í fjør