Norðurlendskur fundur millum fíggjarmálaráðharrar

Norðurlendsku fíggjarmálaráðharrarnir hittust fyrradagin í Eidsvoll í Noregi.

Á skránni vóru fíggjarpolitisku avleiðingarnar av krígnum í Ukraina og umrøða av almenna leiklutinum í serligum støðum, tá farsóttir og kríggj herja.

Hetta var gjøgnum MR-Finans, sum er norðurlendska ráðharraráðið fyri búskapar- og fíggjarpolitikk.

Uni Rasmussen, landsstýrismaður, kunnaði um búskaparligu støðuna í Føroyum, og hvussu føroyskir myndugleikar hava handfarið støðuna síðstu tvey árini.

Somuleiðis greiddu hinir ráðharrarnir frá støðunum í ymsu londunum og teimum átøkum sum eru framd síðstu tíðina. Fundurin gav ráðharrunum høvið at umrøða hvørji atlit eiga at vera tikin tá fíggjarpolitikkurin verður lagdur.

Fíggjarmálaráðið