Noreg leingir ferðafrámælið til 15. apríl

Norska uttanríkisráðið leingir nú frámælið um at ferðast uttanlands til 15. aprí. Tað merkir, at mælt verður frá øllum óneyðugum ferðum uttanlands.

Tað er smittustøðan í heiminum sum heild, sum er orsøkin.

- Hóast vit hava livað við farsóttini í eitt ár, er framvegis langur vegur áðrenn støðan gerst normal aftur, og smittustøðan nógva staðni í heiminum broytist alla tíðina, sigur norska uttanríkisráðkvinnan, Ine Eriksen Søreide í tíðindaskrivi í dag.

Sambært tíðindaskrivinum er frámælið galdandi fyri øll lond við undantak av londum í EBS- og Schengen-økinum við lágari smittu.

Í løtuni er her bert talan um Føroyar, Ísland og Grønland og nøkur fá økir í Finnlandi.

Bæði smittustøðan og tiltøkini í teimum einstøku londunum kunnu broytast skjótt. Uttanríkisráðið heitir tí á norskar borgarar, ið umhugsa at fara út at ferðast, at hugsa seg væl um, og seta seg væl inn í støðuna og reglurnar í landinum tey ætla at fara til.