Noreg støðgar ættleiðing úr fleiri londum

Norsku myndugleikarnir tóku í gjár avgerð um at støðga øllum ættleiðingum úr londunum Peru, Suðurafrika, Kekkia og Ungarn. Tað skrivar miðilin VG.

Sambært Bufdir, sum er stjórnarskrivatovan, sum tekur sær av barna-, ungdóms- og familjumálum, er orsøkin, at tey ikki kunnu fáa vissu um, at ættleiðingarnar úr hesum fýra londum verða framdar á lógligan, etiskan og álítandi hátt.

Í Suðurafrika snýr tað seg eitt nú um ákærur um mutur, meðan tað í Kekkia snýr seg um brúk av sokallaðum “babyboksum”, har foreldur kunnu avlevera teirra børn uttan at navngeva seg.

Fyrr í ár støðgaði Noreg ættleiðingum úr Filipsoyggjum, Tailandi og Taiwan, tí vandin fyri skjalafalsan var ov stórur.

Bufdir hevur annars mælt til fyribils at støðga allari ættleiðing til Noregs, skrivar VG.