Seinastu dagarnar hevur steðgur verið í koppsetingini fyri koronu á sjúkrahúsunum í Føroyum, men í dag kemur nýggj sending av koppingarevni, og latið er upp fyri fleiri tíðum til koppseting, boðar Landssjúkrahúsið frá.
Í sendingini, sum kemur til landið í dag eru fimm bakkar við koppingarevni frá Pfizer/BioNTech. Talan er um uml. 6.800 skamtar tilsamans.
Sjúkrahúsverkið metir, at slakur helmingurin av koppingarevninum verður brúktur til endurkoppsetingar.
Enn eru tað tey í aldursbólkinum 45 ár og eldri, sum kunnu bíleggja tíð til koppseting. Tað verður gjørt umvegis corona.fo.
36 prosent av fólkinum í Føroyum hava fingið fyrru koppsetingina, meðan 14,7 prosent eru liðugt koppsett, vísa seinastu hagtølini.
Vinarliga broyt tínar kennifíla - og privatlívsstillingar fyri at síggja hetta innihald