Nú ber aftur til at søkja stuðul úr Felagsgrunninum Nuuk, Reykjavík, Tórshavn

Nú ber aftur til at søkja stuðul úr Felagsgrunninum Nuuk, Reykjavík, Tórshavn.

Endamálið við grunninum er at styrkja samstarvið og fatanina millum politikarar og borgarar í Tórshavnar kommunu, Nuuk og Reykjavík, og skulu ummsøkjarar, ið fáa stuðul úr grunninum, birta undir samstarvið millum býirnar, skrivar Tórshavnar kommuna.

Í fjør komu sjey umsóknir úr Føroyum til grunnin. Tær fingu úr 15.000 krónum uppí 40.000 krónur í stuðli.

Mesta stuðulin i fjør fingu verkætlanin Heilsufótbóltur á Argjum og ein 8. flokkur í Eysturskúlanum, ið fingu 40.000 kr. í part. Kvinnurnar, ið spæla heilsufótbólt á Argjum, skuldu brúka stuðulin til eina ferð til Reykjavíkar at spæla fótbólt móti øðrum liðum, ið spæla heilsufótbólt. 8. Flokkurin í Eysturskúlanum skuldi somuleiðis brúka stuðulin til eina ferð til Íslands.

Samlaða stuðulsupphæddin í ár er 900.000 krónur. Hvør býur letur 300.000 krónur í grunnin í ár. Freistin at søkja um stuðul er 1. apríl.