Nú eru 13 lond við í F16-samstarvinum

Bæði Grikkaland og Kekkia hava nú gjørt av at fara upp í samgonguna av londum, sum samstarva um av venja F16-flogskiparar og mekanikarar til Ukraina.

Tað sigur danski verjumálaráðharrin, Troels Lund Poulsen, sum er á ráðharrafundi hjá ES í Toledo í Spania. Samgongan byrjaði við fýra londum, sum nú eru komin upp á 13.

Danski ráðharrin væntar, at fleiri lond fara at leggjast afturat henda komandi mánaðin.

Enn er óvist hvat tey bæði nýggju londini fara at koma við í samstarvinum.

- Vit koma at tosa um tað. Vit halda fundir á embætisfólkastigi hvørja viku, greiðir Troels Lund Poulsen frá fyri Danmarks Radio. Tað eru Danmark og Niðurlond, sum hava leiðsluna í samstarvinum.

Higartil eru tað bert Danmark, Niðurlond og Noreg sum hava latið F16-flogfør, men eisini her roknar danski verjumálaráðharrin við, at fleiri lond fara at leggjast afturat.