Nú eru fimm funnin deyð

Nú eru fimm lík funnin eftir skriðulopið, sum mikudagin rakti norska býin Ask norðanfyri høvuðsstaðin Oslo.

Tað upplýsir norska løgreglan fyri NRK.

Eitt lík varð funnið fríggjadagin, trý vórðu funnin í gjár, og tað fimta varð funnið tíðliga í morgun.

Higartil hevur løgreglan bert eyðmerkt eitt av líkunum – ein 31 ára gamal maður, sum varð funnin í gjár.

Enn eru fimm fólk saknaði eftir skriðulopið, og løgregla, sløkkilið og onnur hava seinastu tíðina leitað um alt samdøgrið við vón um at finna fólk á lívi, skrivar Ritzau.

Bjargingararbeiðið er tó trupult, av tí at umstøðurnar í vanlukkuøkinum eru óstøðugar.

Síðan vanlukkuna eru fleiri enn 1.000 fólk flutt burtur úr økinum.