Nú kunnu útisetar og útlendingar koppsetast í Føroyum

Í dag hevur tíðindafundur um koronu verið. Har varð millum annað boðað frá, at nógvir skamtir av koppseting eru ávegis, at tey ungu sleppa skjótari framat. 

Les eisini: Tey ungu sleppa skjótari framat til koppseting

Nú boða heilsumyndugleikarnir frá, at koppsetingarkunngerðin er broytt soleiðis, at persónar, sum eru í Føroyum í longri tíðarskeið, eisini kunnu koppsetast í Føroyum.

Heimasíðan corona.fo skrivar, at talan er um útisetar og útlendingar, sum uppihalda sær í Føroyum í minsta lagi 30 dagar. Hesi kunnu fáa fyrru koppseting, tá ið tey hava verið í Føroyum í 14 dagar.