Nú skalt tú rinda 20 krónur meira um mánaðin til KvF

Løgtingið samtykti í gjár eitt uppskot til broyting í løgtingslóg um kringvarp, sum ber í sær, at Kringvarp Føroya verður styrkt fíggjarliga komandi árini.

Lógaruppskotið merkir, at kringvarpsgjaldið hækkar við 20 krónum um mánaðin við virknaði frá 1. juni í ár. Kringvarpsgjaldið fer eisini at verða prístalsjavnað við tveimum prosentum frá 1. januar 2025, soleiðis at lagt verður upp fyri prísvøkstri.

Lógarbroytingin merkir eisini, at kringvarpsgjaldið fyri ávísar smærri virki, stovnar o.o. lækkar við 500 kr. um árið.

Kringvarpsgjaldið hevur staðið í stað í nógv ár, og lagt hevur ikki verið upp fyri øktum lønarútreiðslum og prísvøkstri í samfelagnum.

Kringvarp Føroya fær við hesari lógarbroyting upp ímóti níggju milliónir krónur meira í kassan árliga, og kemur harvið upp um 80 milliónir í inntøkum árliga.