Alda Nielsdóttir
Seinnapartin í gjár endaði atkvøðugreiðslan hjá limunum í konservativa flokkinum um, hvør skal yvirtaka leiðsluna av flokkinum eftir Boris Johnson.
Fyrst í august vórðu atkvøðuseðlar sendir út til teir uml. 200.000 limirnar í flokkinum. Umframt brævatkvøðu bar til at atkvøða talgilt, og í gjár varð latið aftur fyri atkvøðugreiðsluni.
Mánadagin verður so boðað frá, hvørt tað er fyrrverandi fíggjarmálaráðharrin Rishi Sunak ella núverandi uttanríkismálaráðharrin, Liz Truss, sum gerst nýggjur leiðari í konservativa flokkinum og harvið eisini bretskur forsætisráðharri.
Roknað verður við, at nýggi leiðarin verður Liz Truss. Sambært tíðindastovuni Reuters hava meiningakanningar víst, at Truss hevur munandi meira undirtøku enn Sunak.
Tað var 7. juli, at Boris Johnson, sum hevur verið bretskur forsætisráðharri síðan 24. juli 2019, boðaði frá, at hann fór at leggja frá sær sum floksformaður og forsætisráðharri. Hetta gjørdi hann eftir at hava verið undir stórum trýsti, tá fleiri ráðharrar løgdu frá sær fyri at mótmæla handfaring hansara av fleiri gølum. Millum teir, sum løgdu frá sær í juli var eisini Rishi Sunak.
Týsmorgunin fer Boris Johnson sambært The Guardian formliga at leggja frá sær sum forsætisráðharri.
Vinarliga broyt tínar kennifíla - og privatlívsstillingar fyri at síggja hetta innihald