Nýggj upprunaføroysk myndabók til smábørn

Bókadeild Føroya Lærarafelags gevur nú út nýggja upprunaføroyska myndabók til smábørn.

“Eg vil eisini!” er smábarnabók, sum Guðrið H. Jacobsen hevur skrivað, og Henny
Dánialsdóttir hevur myndprýtt. Hetta er fyrsta bók hjá bæði rithøvundi og myndprýðara.

Fílurin vil duga at sveiggja í trøunum líka sum apan, og apan vil duga at gera springvatn líka sum fílurin. 1, 2, 3 – og nú!

Hetta er ein fitt og stuttlig søga við elskuligum myndum, um at vilja duga tað, sum hini duga. Men vit eru øll ymisk, og duga øll okkurt serligt.

Guðrið er námsfrøðingur og fæst við handaligt virksemi á verkstaðnum Vón. Hon er úr Miðvági og býr í Havn. Søgan er íspunnin saman við hennara børnum.

Henny er myndlistalærari á Nám X og ráðgevi á Námi. Í frítíðini fæst hon við nógv kreativt sum at mála, gera grafikk og glaslist. Hon er úr Oyndarfirði og býr í Havn. 

Bókin kemur í handlarnar 22. mars.

Í samband við hetta verður útgávutiltak fyri børn dagin eftir, leygardagin 23. mars klokkan 15, í nýumvældað barnabókasavninum í Havn. Guðrið fer at lesa søguna, og Árni Jóhannesson úr Látiløtuni kemur at syngja og spæla nakrar barnasangir við børnunum.

Aftaná verður ein drekkamunnur og møguleiki at keypa bókina fyri serprís. Høvi verður at hitta rithøvundin og myndprýðaran.

Bókadeild Føroya Lærarafelags