Nýggjársbálið er eingin ruskspann

Føroya Náttúru og Umhvørvisfelag FNU minnir í sambandi við nýggjárið um at brenna reinan, óviðgjørdan og turran við á bálinum.

- Seinnu árini hava vit í FNU nakrar ferðir fingið prei um, at felags nýggjársbálini hjá kommunum gerast undanførsla hjá virkjum at sleppa sær av við burturkast. Slíkt burturkast, sum tey kanska annars skuldu goldið fyri at sloppið av við, ella sum er óhøgligt at sleppa av við á lógligan hátt.

- Er hetta rætt, taka vit fyri givið, at kommunurnar eru á varðhaldi og ansa eftir, at slíkt ikki hendir, og at bert tilfar, ið er hóskandi til nýggjársbálið sleppur í bálið. Lat hetta vera okkara áheitan á virkir og kommunur á nýggjárinum, skrivar FNU.

Verður annað koyrt í bálið, sum t.d. viðgjørdur viður ella tangar við restum av evnafrøðiligum lúti, kann tað í ringasta føri skaða heilsuna hjá fólki og hava skaðilig árin á umhvørvið, sigur felagið.

At brenna nýggjárbál krevur góðkenning frá heimstaðarkommununi. Vegleiðing frá Umhvørvisstovuni um nýggjárbál sæst at lesa her.