Leygardagin 5. mars klokkan 14 letur nýggja barna- og ungdómstilboðið upp í nýggjum hølum í Sandavági.
Virkishúsið verður opið hvønn gerandisdag og leygardag, við eini fjølbroyttari viftu av tilboðum, tiltøkum og verkstovum. Virkishúsið er fyri børn og ung í aldursbólkinum frá 3. flokk til og við 17 ár. Men ungdómshúsið hevur enn einki navn.
Í sambandi við, at Vága kommuna letur upp eitt virkishús fyri børn og ung, verður tí navnakapping, har øll tey ungu í kommununi millum níggju og 17 ár kunnu taka lut.
Vinnarin av kappingini fær 1.000 krónur. Einasta kravið er, at navnið skal vera lætt at siga og hóska til barna- og ungdómstilboðið. Lyklaorð fyri nýggja barna og ungdómstilboðið verða at tað er livandi, skapandi og fjølbroytt.
Navnauppskot skal, saman við frágreiðing um, hví ein heldur navnið vera hóskiligt, latast Vága kommunu í seinasta lagið fríggjadagin 25. februar klokkan 12. Meira kunning fæst á heimasíðuni hjá kommununi.
Vinarliga broyt tínar kennifíla - og privatlívsstillingar fyri at síggja hetta innihald