Ógvuslig koyring í Klaksvík kostaði eitt koyrikort

Løgreglan hevði nakrar hendingar í ferðsluni í sínari døgnrapport. Tann mest "eyðsýnda" av hesum var á vegnum millum Klaksvík og Norðoyri.

Á einum parti av tí strekkinum , framvið millum annað økinum úti í Grøv, er 60 km/t øki. Í gjár varð ein bilførari máldur at koyra 126 kilometrar um tíman har.

Hetta gevur ikki bert eina bót ella eitt klipp. Slík ferð í slíkum øki kostar koyrikortið.

Harvið noyddist bilførarin á Borðoynni av við sítt koyrikort á staðnum. Hann slapp tó at koyra heim og seta bilin.

Rúsdrekkakoyring í Kollfjarðadali - steinur á Sandavágshálsi

Í Kollfjarðadali varð ein bilførari tikin fyri rúsdrekkakoyring, sum viðkomandi er skuldsettur fyri nú.

Ein bilur fekk nakað av skaða á Sandavágshálsi, tí hesin koyrdi á ein stein. Orsakað av hesum lak bilurin olju.