Økja brúkaravernd á matstovum

Í fíggjarlógaruppskotinum fyri 2023 eru 800.000 krónur settar av til at gera eina nýggja skipan, sum skal geva viðskiftafólkum einfalda kunning um, hvørt matvørutrygdin er nøktandi á matstovum og øðrum støðum, sum eru fevnd av matvørulógini, og har almenningurin hevur atgongd.

Tá Heilsufrøðiliga starvsstovan fremur eftirlit á matstovum o.ø., verður, umframt ta vanligu eftirlitsfrágreiðingina, eisini skrivað ein standardiserað frágreiðing, sum skjótt og lætt gevur brúkarum viðkomandi kunning um matvørutrygd, reinføri o.a.

Skeltið við frágreiðingini skal heingjast upp beinanvegin, sum Heilsufrøðiliga starvsstovan hevur útflýggjað tað, og skal hanga á sjónligum stað beint við inngongdina, so brúkarin lættliga kann kunna seg um eftirlitsúrslitið. Í frágreiðingini verður stutt kunning um tað, sum er kannað, og hvat kanningarnar hava víst.

– Skipanin fremur brúkaravernd og eggjar samstundis matstovum o.ø. at skapa og halda eitt høgt góðskustig, sigur Magnus Rasmussen, landsstýrismaður sambært heimasíðuni hjá Umhvørvis- og vinnumálaráðnum.

Skipanin fer at nýta somu trý andlitsbrá, sum líknandi skipanir í grannalondunum nýta. Tey eru:

• Eitt fegið brá, um Heilsufrøðiliga starvsstovan ongar viðmerkingar hevur
• Eitt strangt brá, um Heilsufrøðiliga starvsstovan hevur staðfest frávík og givið ávaring frammanundan ella sett tiltøk í verk
• Eitt misnøgt brá, um Heilsufrøðiliga starvsstovan hevur staðfest álvarslig frávik ella afturvendandi brot á reglurnar, og hevur givið ávaring ella sett tiltøk í verk.