Olivia Newton-John deyð, 73 ára gomul

Bretska-australska sangarinnan og sjónleikarin Olivia Newton-John er deyð. Hon gjørdist 73 ára gomul.

Tað upplýsir maður hennara, John Easterling, í einum uppslagi á hennara Facebooksíðu.

Hon andaðist friðarliga við hús, og kring seg hevði hon vinir og familju. Hetta hendi mánamorgunin lokalatíð har suðuri í Kalifornia.

Olivia Newton-John er serliga kend fyri sín leiklut í filminum “Grease” frá 1978, har hon spældi “Sandy” saman við John Travolta í leiklutinum sum “Danny”.

Hon er fødd í Cambridge í Bretlandi, men er vaksin upp í Australia. Seinni flutti hon til USA at búgva.