Olja á fleiri vegastrekkjum í høvuðsstaðnum

Løgreglan kom seinnapartin í gjár við fráboðan um, at olja var á Dalavegnum og heitti á bilførarar um at koyra varliga. Hetta var niðast á Dalavegnum við Herbergið, men tað vísti seg skjótt, at olja var eftir øllum vegastrekkinum, verður upplýst av løgreglustøðini í morgun.

Staðfest var eisini, at tað var hált ymsastaðni á ringvegnum og á Rundingi - vegamótið oman ímóti Vestara bryggju, har oljufeløgini halda til.

Illgruni var um ein tangabil, sum var farin umborð á Smyril, og skuldi til Suðuroyar seinnapartin í gjár.

Í samstarvi við skiparan á Smyrli varð staðfest, at olja var likin úr tangabilinum, og hann varð fingin í land.

Talan er um nógvar litrar tilsamans, so viðkomandi oljufelag kann vænta sær eina rokning fyri upprudding, sigur vaktleiðarin á løgreglustøðini.

Eina løtu seinni kom fráboðan um olju í Havnará við Plantasjuna. Tað er tó ikki illgruni um, at hetta stavar frá tí sama. Hinvegin kundi tað verið niðurtøkan av gamla B36 húsinum og Framhúsinum, sum kann vera orsøkin.