Østrøm: 10 ár við føroyskari sniðgávu

Í ár eru tað 10 ár síðani, at leigusáttmáli bleiv undirskrivaður um handilshølini í Fabrikkini hjá Öström, sum søguligi bygningurin varð kallaður á manna munni, og 29. mars í 2012 gjørdist nýggi handilin við føroyskari sniðgávu veruleiki. 

– Endamálið var frá fyrsta degi at geva føroysku sniðgevunum ein virðiligan pall og harvið at stuðla upp undir menningina av føroyskari sniðgávu. Ynskið er, at føroysk sniðgáva gerst ein sjálvsagdur partur av føroyska samleikanum, á sama hátt sum aðrar listagreinar, sigur Hans Juul Hansen, eigari av Østrøm-handlinum.

Tá Østrøm fyrstu ferð læt dyrnar upp til sermerktu handilshølini á Skálatrøð, vóru tað 6 føroyskir sniðgevar, ið sýndu fram og seldu sínar vørur í handlinum. Í dag, 10 ár seinni, finnur tú vørur frá fleiri enn 30 sniðgevum í handlinum, og stórur eftirspurningur er um at sleppa framat.

Um hesa tíðina í fjør víðkaði Østrøm um handilin. Ovara høllin, sum fyrr varð útleigað til ymisk tiltøk, gjørdist partur av handlinum, og rúmar nú einum fjølbroyttum úrvali av føroyskari klædnasniðgávu. Menningin seinastu 10 árini sæst tó ikki bert aftur í víðkaða vøruúrvalinum, men spennir seg eisini út um handilshølini á Skálatrøð. 

Í skapandi umhvørvinum á Skálatrøð hittast føroyskir sniðgevar, og samstørv teirra millum eru sprottin úr tí umhvørvinum. Og við framsýningum, ið eru fyriskipaðar í samstarvi við føroysku sniðgevarnar, er føroysk sniðgáva rokkin út um landoddarnar. Stóra menningin sæst eisini aftur í at seinastu 10 árini hava ikki færri enn 9 føroyskir sniðgevar, ið hava selt sínar vørur hjá Østrøm, latið egnar sølubúður upp kring landið. 

Føroyingar hava tikið sera væl ímóti Østrøm. Seinastu árini hevur ein vaksandi skari av ferðafólki eisini sýnt føroyskari sniðgávu áhuga. Somuleiðis hava útlendsku miðlar víst Østrøm áhuga, og er handilin umrøddur og viðmældur í viðurkendum útlendskum bløðum so sum New York Times, The Guardian, Washington Post og Vogue.

Orsakað av óvissu støðuni viðvíkjandi korona var upprunaliga ætlanin at hátíðarhalda 10-ára føðingardagin seinni í ár, men tað er nú framskundað nakað. Frá týsdegnum 26. apríl til leygardagin 30. apríl verður føðingardagurin hátíðarhildin við tilboðum, burturluting av vinningum og øðrum góðum.