Ov tungt fíggjarliga at skipa fyri Kristfest

Avgerð er tikin um, at kristni tónleikafestivalurin Kristfest, ikki verður aftur í 2025.

Hetta skrivar Trúboðin á heimasíðuni.

Orsøkin er, at tað hevur verið fíggjarliga tungt at skipað fyri festivalinum.

– Festivalurin í ár var væl fyriskipaður við góðum tónleiki og framúr góðum kørmum í Nesvík. Men tíverri mugu vit staðfesta, at tað skal nógv størri undirtøka til fyri at eitt slíkt tiltak melur runt fíggjarliga. Tí er avgerð tikin um, at Kristfest ikki verður aftur á skránni í ár, sigur Jákup Brúsá, aðalskrivari í Kirkjuligu Heimamissiónini.

Festivalurin í fjør borðreiddi við góðum kristiligum tónleiki, og høllin í Nesvík vísti seg frá síni bestu síðu. Men tað er ikki fíggjarliga forsvarligt at skipa fyri festivalinum, tá hann hevur givið eitt stórt undirskot bæði árini, skrivar Trúboðin.