Pakistan: Skottilburður á gistingarhúsi

Seinnapartin í dag varð boðað frá, at skotið varð inni í einum gistingarhúsi í pakistanska býnum Gwadar.

Gistingarhúsið Pearl Continental Hotel Gwadar varð, sambært DR, hertikið av yvirgangsmonnum, og eisini verður boðað frá, at menninir og løgreglan hava skotið eftir hvør øðrum. 

Eitt trygdarstarvsfólk á gistingarhúsinum hevur latið lív.

Hetta gistingarhúsið verður serliga brúkt av handilsfólkum og útlendskum ferðafólkum. Tað er ógreitt akkurát hvussu nógv vóru stødd í húsinum, tá menninir byrjaðu at skjóta.

Sambært innlendismálaráðharranum, er meginpartuin av gestunum fluttur úr gistingarhúsinum.

Býurin Gwadar er í Baluchistan-landspartinum, har fleiri yvrigangsálop hava verið seinastu árini. Eitt nú vórðu 14 fólk dripin í einum bussi ávgeis til Gwadar í apríl.

Fleiri hernaðarbólkar eru í hesum landspartinum, eitt nú pakistanska deildin hjá Taliban.

Sambært Reuters hevur hernaðarbólkurin "The Balochistan Beration Army" tikið ábyrgdina fyri álopið. Hesin uppreistrarbólkurin stríðist fyri at gera Baluchistan sjjálvstøðugt.