Páll á Reynatúgvu umhugsar støðuna

Í gjár varð kunngjørt, at løgtingskvinnan Kristina Háfoss tekur við starvinum sum stjóri fyri Norðurlandaráðnum 1. februar komandi ár.

Harvið fer hon í farloyvi úr tinginum, og ein annar persónur skal harvið inn. Páll á Reynatúgvu, ið var løgtingsformaður seinasta valskeið, er næstur á listanum hjá Tjóðveldi.

Páll á Reynatúgvu sigur við Kringvarpið, at hann fer at hugsa seg um í nakrar dagar, um hann skal fara aftur í løgtingið.

Á valinum í fjør fekk Páll á Reynatúgvu 252 atkvøður. Næstur honum er Ingolf S. Olsen við 248 atkvøðum. Um Páll ikki tekur við sessinum er tað harvið upp til Ingolf, um hann tekur sæti ella ikki.