Alda Nielsdóttir
Í gjár var tjóðartingsval í Portugal, og tá eydnaðist sitandi sosialistiska stjórnarflokkinum (PS) at tryggja sær einsamallan meiriluta. Sostatt hevur flokkurin ikki tørv á stuðul frá øðrum flokkum fyri at kunna varðveita valdið.
Í veljarakanningunum, sum vórðu gjørdar áðrenn valið, stóð flokkurin til at fáa nærum 34 prosent av atkvøðunum. Á seinasta vali fekk flokkurin 38,5 prosent, og í gjár endaði PS við at fáa 42 prosent av atkvøðunum.
Triðstørsti flokkurin gjørdist Chega, ið liggur uttast á høgravonginum. Flokkurin fer sostatt frá at hava eitt umboð í tinginum til 11.
Sosialistaflokkurin hevur tryggjað sær 117 av teimum 230 sessunum í tinginum, og fyri at fáa meiriluta krevst 116. Á seinasta vali fekk flokkurin 108 sessir, skrivar Ritzau.
Tjóðartingsval varð útskrivað í november eftir at stuðulsflokkarnir, kommunistaflokkurin og vinstablokkurin, valdu at stuðla andstøðuni á høgravonginum, sum ikki vildi góðkenna fíggjarlógaruppskotið hjá stjórnini.
António Costa, formaður í sosialistaflokkinum, hevur verið forsætisráðharri síðan november 2015.
Vinarliga broyt tínar kennifíla - og privatlívsstillingar fyri at síggja hetta innihald