Putin fer til Kina seinni í vikuni

Russiski forsetin, Vladimir Putin, fer hósdagin og fríggjadagin á vitjan í Kina. Hesum boða russiskir og kinverskir miðlar frá í dag.

Talan verður um fyrsta uttanlandstúr hjá russiska forsetanum eftir at hann var afturvaldur til forseta í mars mánaði. Síðst hann vitjaði Kina var í oktober í fjør.

Putin og kinesiski forsetin, Xi Jinping, skrivaðu undir eina týdningarmikla samstarvsavtalu í februar 2022, stutt undan at Russland gjørdi innrás í Ukraina.

Diplomatisk og handilssambond við Kina hava fingið alt størri týdning fyri Russland eftir kríggið, tí fleiri vestanlond nú boykotta Russland, skrivar norska NTB tíðindastovan.