Í morgin, týsdagin 24. mai, verður almenn ráðstevna, har rúsevnismisnýtsla verður sett á breddan.
Løgmansskrivstovan, Uttanríkis- og mentamálaráðið, Heilsumálaráðið og Almannamálaráðið skipa fyri ráðstevnuni, sum verður í Lívdini í Hoyvík frá klokkan 8.45 til klokkan 16.15.
Ráðstevnan tekur útgangsstøði í Heildarætlanini um at fyribyrgja og tálma rúsevnismisnýtslu í Føroyum, sum varð almannakunngjørd í vár. Í heildarætlanini er dentur lagdur á fyribyrging í breiðum týdningi, har trivnaður, góðir felagsskapir og samstarv tvørtur um geirar eru lyklaorð, skrivar Løgmansskrivstovan.
Á ráðstevnuna verða tvey yvirskipaði evni viðgjørd:
- Hví er trivnaður, so týdningarmikil, tá ið tað kemur til fyribyrging?
- Hvussu hjálpa vit teimum, sum longu hava ein trupulleiki?
Fleiri fyrilestrarhaldarar fara at umrøða evni úr heildarætlanini úr ymiskum sjónarhornum og orðaskifti verður um, hvussu vit seta átøkini í heildarætlanini í verk.
Tað er ókeypis at luttaka á ráðstevnuni, men tó er neyðugt at melda seg til áðrenn. Meira kunning um hetta fæst her.
Vinarliga broyt tínar kennifíla - og privatlívsstillingar fyri at síggja hetta innihald