Royna fyri triðju ferð í morgin

Í morgin, mánadagin fara umboð fyri Russland og Ukraina at gera eina triðju roynd at samráðast fyri at fáa ein enda á stríðið landanna millum.

Higartil hava samráðingar ikki verið á ráðharrastøði, men ukrainski uttanríkismálaráðharrin, Dmytro Kuleba segði í gjár, at hann er opin yvirfyri møguleikanum at hitta russiska starvsbróðir sín, Sergej Lavrov.

Ísraelski forsætisráðharrin, Naftali Bennett hevur tosað við Vladimir Putin, forseta í Russlandi, og Volodimir Zelenskij, og turkiski forsetin, Recep Tayyip Erdogan, hevur eisini havt eina langa telefonsamrøði við Putin í dag, har hann heitti á hann um at lýsa vápnahvíld í Ukraina og undirskria eina friðaravtalu.

Av skrivstovuni hjá turkiska forsetanum verður sagt, at Turkaland er til reiðar at hjálpa við at finna fram til eina friðarliga loysn.