Russar eggja til ófrið í Moldova

Løgreglan í Moldava upplýsir, at hon hevur handtikið fleiri persónar, ið verða mettir at hava havt ætlanir um at skapa ófrið í landinum. Sambært løgregluni eru menninir partur av russiskt skipaðum netverki, sum hevur til endamáls at órógva (destabilisera) landið.

Sjey mans eru handtiknir og 25 onnur hava verið til avhoyringar, upplýsir løgreglan. Ein russisk-moldavskur maður er leiðari fyri bólkin, verður sagt.

Um vikuskiftið vístu markavørðar í Moldava fleiri persónar aftur. Ein teirra sigst vera limur í illa gitna Wagner-leigumannaherinum.

Moldavskir myndugleikar upplýsa, at løgreglan hevur sníkt seg inn í bólkin og hevur havt høvi til at taka upp myndir og ljóð sum prógv móti bólkinum.

- Tað komu fólk úr Russlandi, sum høvdu til uppgávu at leggja teimum lag á, upplýsir ein kelda í russisku trygdarverjuni fyri AFP tíðindastovuni.

Russland vísir aftur, at landið ger royndir at órógva politisku skipanina í Moldava.

Andstøðuflokkurin Shor, undir leiðslu av útlagna vinnulívsmanninum Ilan Shor, hevur skipað fyri mótmælistiltøkunum móti stjórnini hesar seinastu dagarnar.

Ilan Shor verður mettur at hava tætt tilknýti til Kreml, og flokkur hansara er meira vinarligur mótvegis Russlandi, en sitandi stjórnin, sum roynir at stýra landinum móti einum møguligum ES-limaskapi.

Seinasta mótmælistiltakið hjá flokkinum var sunnudagin, sama dag sum løgreglan handtók menninar, ið eru skuldsettir til at eggja til ófrið. Umleið 4.000 fólk savnaðust uttan fyri tjóðartingið, men løgreglan forðaði teimum í at ganga haðani móti stjórnarbygninginum, skrivar finska kringvarpið YLE.

Russiska álopið á grannalandið Ukraina rakar Moldava hart. Kríggj og stongsul hevur ført til stóra inflasjón. Í desember øktust prísirnir við 30 prosentum, sammett við prísirnar árið frammanundan.

Russiskt vinarliga lýveldið Transnistria á markinum móti Ukraina, ger ikki støðuna lættari. Russland hevur havt sonevndar friðarvarðveitandi deildir í Transnistria síðan 1992.

Føroyska fótbóltslandsliðið skal spæla landsdyst í Moldava 24. mars. Atlantsflog vildi ikki flúgva hópin allan vegin til Chișinău, høvuðsstaðin í Moldava orsaka av ótryggu støðuni. Fótbóltssambandið hevur tí funnið annað flogfelag at flúgva hópin úr Keypmannahavn til Moldava.