Russar taka seg fram har eysturi í Ukraina

Bý fyri bý taka russar seg í hesum døgum longur inn í Ukraina. Nýggjastu fráboðanirnar frá russiska verjumálaráðnum eru, at býurin Selydove í Donetsk-landslutinum, nú er komin á russiskar hendur, skrivar dr.dk.

Russisku deildirnar hava seinastu vikurnar vunnið seg longur inn í Ukraina, ljóða boðini frá Institute for the Study of War. Men tað gongur spakuliga, sigur ein hernaðarserfrøðingur hjá danska verjuakademinum fyri DR.

Tað er serliga í økinum í ein útnyðring úr Donetsk býi, at tað gongur framá hjá russisku deildunum.

Hetta seinasta ári hava russiskar herdeildir tikið seg fram frá Avdiivka móti Pokrovsk – hetta svarar til umleið 20 til 30 kilometrar. Tað sær út til, at tað gongur skjótari hjá russum nú, men talan er framvegis um eitt kríggj, sum fer fram spakuliga, sigur hernaðarserfrøðingurin, Anders Puck Nielsen.

Spurningurin er nú, hvussu leingi Russland hevur møguliga at halda fram. Tí russisku tapini eru søguliga høg, men tað sær út til at Russland er sinnað at missa nógv fólk í royndunum at vinna land.

Samstundis verður upplýst, at umleið 10.000 hermenn úr Norðurkorea nú eru komnir til hermótini á markinum móti Ukraina, skrivar dr.dk.

Sambært Anders Puck Nielsen verða nógv tøl nevnd. Men um so er, at 40.000 russisk herfólk eru deyð ella tikin til fanga, so hjálpa 10.000 norðurkoreanar ikki so nógv, vísir hann á.

Býurin Prokrovsk er áhugaverdur hjá russum at fáa tamarhald á, tí ukrainar hava brúkt hann sum veitingarbý, og her er væl útbygt undirstøðukervi, bæði vegir og jarnbreytir.

Hvat víðari hendur í krígnum er rættiliga tengt av, hvat hendir í USA í komandi viku, tí navnið á valda forsetanum fær helst týdning fyri, hvussu nógvar pengar og útgerð, ukrainar fáa til at verja seg móti russum framyvir, skrivar dr.dk.