Russisk herskip rakt í álopi á Krim

Ukraina hevur í nátt framt eitt álop á hersettu Krim-hálvoynna og rakt tvey herskip og annað undirstøðukervi, sum verður brúkt av russiska herinum í havnabýnum Sevastopol.

Talan var um skipini Azov og Yamal, upplýsir ukrainski herurin sambært Reuters.

Russiski guvernørurin í økinum upplýsir, at russiska loftverjan í nátt hevur skotið niður yvir tíggju rakettir.

Ein 65 ára gamal maður lat lív, meðan fýra onnur vórðu særd. Fleiri ferjur og bussar fingu eisini skaða í álopinum, og flutningurin millum Krim og russiska meginlandið var órógvaður í fleiri tímar, upplýsa lokalu myndugleikarnir.

Ukraina hevur eisini verið rakt av russiskum álopum í dag, bæði í høvuðsstaðnum Kyiv og í býnum Lviv í vestara parti av landinum.