Russiskt fiskiskip sakk í Barentshavinum: 17 sjófólk saknað

17 sjófólk eru saknað, eftir at eitt russisk fiskiskip sakk í Barentshavinum, upplýsa russisku myndugleikarnir sambært fleiri tíðindastovum í morgun.

Umborð á skipinum, ið nevnist Onega, vóru 19 fólk, og tvey eru vorðin bjargað. Fimm bjargingarbátar leita í løtuni eftir restini av manningini.

Hildið verður, at tað var ísur, sum var orsøkin til, at skipið sakk, skrivar Ritzau.

Onega varð bygt í 1979.

(Mynd: Fishfacts.com)