Russland: 1.300 mótmælisfólk handtikin í gjár

Fleiri enn 1.300 fólk vórðu handtikin í Russlandi í gjár í sambandi við mótmæli móti krígnum í Ukraina og ætlanina um at senda 300.000 hermenn afturat til Ukraina.

Óhefti mannarættindabólkurin, OVD-Info boðar frá, sambært The Guardian, at mótmælt varð í 38 russiskum býum.

Av teimum gótt 1.300, sum vórðu handtikin í gjár, vóru í minsta lagi 502 handtikin í høvuðsstaðnum Moskva, og 524 í Sankta Pætursborg.

Niðanfyri eru nakrar myndir frá EPA-myndatænastuni, sum eru tiknar í Moskva í gjárkvøldið.