Russland: Hava forðað tveimum ukrainskum álopum í nátt

Russiska loftverjan hevur í nátt forðað einum ukrainskum rakettálopi móti russiska Kaluga-landslutinum í vestara parti av landinum, sigur russiska verjumálaráðið.

Russiski guvernørurin í Sevastopol á hersettu Krim-hálvoynni, Mikhail Razvozjajev sigur eisini, at fleiri dronur vórðu sæddar og oyðilagdar við Krim í nátt.

Hann sigur ongar ábendingar vera um, at sivilt infrakervi skal hava fingið skaða í sambandi við hendingarnar, og heldur ikki er boðað frá fólkaskaða, skrivar Ritzau.

Seinastu mánaðirnar hevur russiski høvuðsstaðurin Moskva og Krim verið fyri dronuálopum ella álopsroyndum. Sambært Russland er tað Ukraina, sum stendur aftanfyri.