Samd um stuðul til Ukraina og NATO - ósamd um samstarv við Russland

Frágreiðingin “Mapping Public Opinion in The Faroe Islands on Security and Foreign Affairs” er nú tøk.

Talan er um eina kanning um hugburð føroyinga til uttanríkis- og trygdarpolitikk. Heini í Skorini, lektari á Søgu- og samfelagsdeildini, hevur havt ábyrgdina av kanningini. Hon vísir millum annað, at føroyingar eru rættiliga samdir um at stuðla Ukraina og NATO, men at veljarafjøldin í Føroyum er ósamd í spurninginum um framhaldandi fiskiveiðusamstarv við Russland.

Hetta skrivar Fróðskaparsetur Føroya á heimasíðu sínari. 

Kanningin vísir greitt, hvussu føroyingar hava tað í mun til Ukraina, og hvussu Landsstýrið hevur handfarið hetta.

- Ein meiriluti av føroyingum tekur undir við átøkunum hjá Føroya Landsstýri í sambandi við kríggið í Ukraina. Bæði tá talan er um at fordøma russiska álopskríggið alment, senda pengar til Ukraina, taka ímóti ukrainskum flóttafólki og avmarka atgongd hjá russiskum skipum til føroyskar havnir.

Hóast hetta - og hóast stóran stuðul til NATO sum heild - so er føroyska veljarafjøldin ósamd í spurninginum um framhaldandi fiskiveiðusamstarv við Russland.

Til ber at lesa meira meira um úrsltiini HER

Hetta eru nakrar av niðurstøðunum í kanning, sum Søgu- og samfelagsdeildin hevur gjørt saman við greiningarfyritøkuni Lóðuri.

Kanningin varð gjørd í mai 2024, og vóru úrslitini løgd fram á almennum tiltaki á Søgu- og samfelagsdeildini seinast í mai. Nøkur av høvuðsúrslitunum eru nú savnað í hesi frágreiðing.

Hetta er onnur kanningin um fólksligan hugburð til uttanríkis- og trygdarpolitisk viðurskifti hjá Søgu- og samfelagsdeildini. 

- Nýggja kanningin vísir, at føroyski veljarin í størri mun stuðlar føroyskum samstarvi við NATO og vesturheimin í 2024 samanborið við 2021. Samstundis halda færri, at Føroyar skulu vera neutralar ella uttanveltaðar í uttanríkis- og trygdarpolitiskum viðurskiftum. Kortini vísir kanningin eisini, at bara helvtin av føroyingum stuðlar hernaðarvenjingum og øðrum hernaðarligum virksemi í føroyskum øki.