Sami førari koyrdi frá rokningini tvær ferðir

Løgreglan í Havn fer í dag at leita eftir einum ávísum bili og eigara tess eftir at ein bensinstøð hevur meldað ein stuldur av bensini.

Bensinstøðin hevur staðfest, at sami bilur og sami maður í tveimum førum henda mánaðin er farin avstað uttan at rinda eftir at hava fylt sær tangan við bensini.

Vaktleiðarin á løgreglustøðini sigur, at tey hava góð spor at ganga eftir tí flest allar bensinstøðir hava vakmyndatól, sum taka myndir í góðari góðsku, so at nummarspjaldrið á bilinum týðuliga kann lesast, og tað eisini fæst ein týðulig mynd av persóninum, sum koyrir bilin.

Tá funnið er fram til mannin, verður hann skuldsettur fyri stuldur, verður upplýst.