Sankta Frans Skúli 90 ár – ein varði í Varðagøtu

Í dag eru 90 ár liðin, síðani Sankta Frans Skúli varð tikin í nýtslu uppí í Varðagøtu. Í hesum sambandi hevur hátíðarhald verið, og nógv fólk var komið saman í skúlanum at hátíðarhalda dagin.

Tað vóru Fransiskanarasystrarnar, ið byrjaðu skúlan. Kommunan yvirtók skúlan í 1985.

- Ein varði í Varðagøtu seinastu 90 árini. Tað haldi eg, at vit kunnu siga um Sankta Frans skúla

Hetta segði Heðin Mortensen, borgarstjóri í Tórshavnar kommunu, millum annað í røðu sínari.

Sankta Frans skúli er ein umráðandi partur av skúlasøguni í Tórshavnar kommunu, men borgarstjórin vísti á, at skúlin eisini hevur stóran týdning í hansara persónligu søgu, tí børnini, abbabørn og langabbabørn hjá honum hava gingið í skúlanum.

Borgarstjórin takkaði fransiskanarasystrunum fyri tað, ið tær hava gjørt fyri Havnina og Føroyar, og ynskti teimum góðan byr, nú tær flyta av landinum.

Til seinast fekk Sankta Frans Skúla handað ein málning av skúlanum í gávu. Listamaðurin Finleif Mortensen hevur málað.