Scholz vitjar Xi í Beijing

Fríggjadagin vitjaði týski samveldiskanslarin, Olaf Scholz í Kina. Har hitti hann kinesiska forsetan, Xi Jinping í høvuðsstaðnum Beijing.

Scholz heitti í hesum sambandi á Xi um at brúka sítt tilknýti til Russland til at fáa ein enda á krígnum millum Russland og Ukraina.

Hóast Kina ikki hevur stuðlað russisku innrásini í Ukraina, hevur kinesiska leiðslan síðani styrkt samstarvið við Russland, meðan onnur lond hava sett revsitiltøk í verk.

Í summar gjørdu Russland og Kina m.a. avtalu um at styrkja samstarvið innan fígging, vinnu, og flutning, og í september hittust Putin og Xi eisini í Usbekistan at umrøða samstarvið millum londini.

Týski samveldiskanslarin sigur, at Kina sum ein stór tjóð eisini hevur ábyrgd av at tryggja frið í heiminum.

Ritzau skrivar, at Olaf Scholz er fyrsti vesturlendski leiðarin at hitta, eftir at hann farna vikuskifti tryggjaði sær eitt triðja valskeið sum aðalskrivari hjá kinesiska kommunistaflokkinum.

Kinesiski forsetin sigur, sambært kinesiskum sjónvarpi, at hann vónar, at Kina og Týskland kunnu styrkja samstarvið landanna millum.