Seks fólk vilja avloysa Edvard Heen

Fyri sjey vikum síðani gjørdist greitt, at Edvard Heen skjótt fer úr starvinum sum stjóri í Almannaverkinum.

Hetta verður eftir ellivu ár í sessinum. 67-ára gamli norðmaðurin fer á pensjón 1. august.

Harvið varð sókt eftir nýggjum stjóra í februar, og eftir at umsóknarfreistin nú er farin er greitt, at seks fólk ynskja sær stjórastarvið í landsins størsta stovni.

Kringvarpið skrivar, at talan bæði er um kvinnur og menn, og at bert føroyingar hava søkt. Tað var eisini bert lýst í Føroyum.