Sigrun Gunnarsdóttir sýnir fram í Keypmannahavn

Undir heitinum ”Vingefang”(Veingjabreiði) letur framsýning upp leygardagin á Nordatlantens Brygge í Keypmannahavn.

Tað er Sigrun Gunnarsdóttir, ið sýnir fram, og 40 verk verða við á framsýningini. Umframt málingar er eisini tann stóri spurvurin við á framsýningini – somuleiðis er filmurin ”Heartist” partur av framsýningini.

Fernisering verður leygardagin klokkan 15. Sunnudagin 9. juni klokkan 16, er sokallað ”artist talk”, har stjórin á Listasavni Føroya, Solveig Hanusaradóttir Olsen, kuratorur, hevur prát við Sigrun.

Framsýningin á Norðuratlantsbryggjuni er opin til 22. september.