Sjómaður á grønlendskum trolara fluttur á Landssjúkrahúsið

Í gjárkvøldið mátti tyrlan hjá Atlantsflogi fara eftir einum skaddum sjómanni og flyta hann á Landssjúkrahúsið.

Maðurin var frá einum grønlendskum trolara, sum var staddur 250 sm norður úr Føroyum. Hann hevði fingið skaða umborð, og mátti hann á sjúkrahús í skundi, skrivar Vørn á heimasíðuna.

Fráboðanin kom frá íslendsku bjargingartænastuni, Icelandic Coast Guard um klokkan átta í gjárkvøldið.

Føroyska SAR tyrlan varð send av stað og mátti bunkra í Klaksvík báðar vegir til langa túrin. Nógvur vindur var á leiðini, men tað gekk væl at fáa mannin umborð í tyrluna og víðari á Landssjúkrahúsið, skrivar Vørn.